Komiti Pengawa Bepilih (SPR) deka ngatur sebengkah Aum Khas dikena nentuka kemaya hari ngantung nama, hari ngundi tumu sereta hari muai undi Pengawa Bepilih Besai Nengeri (PRN) Ke-11 Sarawak.
Chairman SPR, Datuk Seri Mohd Hashim Abdullah madahka SPR agi nganti notis rasmi pasal pengawa madamka Kunsil Nengeri (DUN) Sarawak ari Speaker DUN Sarawak (Datuk Amar Mohamad Asfia Awang Nassar).
Taja pia nengah penerang berita kemari, Hashim madahka SPR udah nemu sentang Kepala Menteri Datuk Patinggi Tan Sri Adenan Satem ti udah ngenukuka maya DUN dipadam.
“Pengudah nerima notis pasal pekara nya, SPR deka ngatur Aum Khas dikena nentuka haribulan ti pemadu beguna baka hari ngantung nama, hari undi tumu, hari muai undi, rejista pemilih ti deka diguna enggau kebukai deka ditentuka nengah aum khas tu,” ku iya.
Kemari dalam aum pengarang berita ba Wisma Bapa Malaysia, Kepala Menteri Datuk Patinggi Tan Sri Adenan Satem udah ngenukuka DUN deka dipadam kena 11 April 2016, pengudah dikemendarka Tuai Pemegai Menua (TYT) Tun Pehin Sri Abdul Taib Mahmud.
Hashim madahka PRN11 deka diatur dalam timpuh 60 hari pengudah DUN dipadam sereta penerang pasal pengawa bepilih nya deka dipadahka nangkan nya berenggat- renggat.
“SPR deka ngatur pengawa bepilih nya dalam timpuh 60 hari, ari timpuh DUN Sarawak dipadam,” ku Hashim.
Kelimpah ari nya, Direktor SPR Nengeri Datu Takun Sunggah lebuh ditanya bekaul enggau penyikap komiti nya betapi enggau PRN11, iya madahka sida udah nyikap diri kenyau ari bulan Februari tu tadi.
Iya madahka SPR udah besedia nyengkaum ari sukut logistik dikena nentuka pemujur PRN11.
“Kami nyikap urung 21,000 iku staf PRN…lalu atur pengawa meri licha ngagai semua staf udah tembu dipejalaika dalam bulan Februari 2016.
“Tang ke udah ditentuka semua pemesai pengereja pengawa di serata nengeri udah berengkah bejalaika pengawa ngiga perengka pengangkut enggau logistik bukai,” ku iya madah ngagai Utusan Borneo nengah aplikesyen WhatsApp, kemari.
Timpuh Penggal DUN Sarawak abis kena 20 Jun 2016.
Ba PRN11 serak tu bisi 82 ari 71 sitak deka diperebutka chalun ti bediri minta pilih dibanding enggau atur pengawa bepilih sebedau tu.
Nya berindik ari penambah 11 sitak DUN asil ari atur pengawa ngaduka garis baru ti dipejalaika SPR taun nyin kemari.-BP
No comments:
Post a Comment