Kepala Menteri Datuk Patinggi Tan Sri Adenan Satem dekaka mandat besai ari rayat ungkup diri iya ke nyadi ketuai Perintah Sarawak ba Pengawa Bepilih Nengeri ke-11 (PRN11).
Bejaku ba pengerami Ngelanchar Raban Pengereja Pengawa Bepilih N.15 Asajaya, N.16 Muara Tuang enggau N.17 Stakan di Dewan Suarah Samarahan ensanus, iya ke mega Presiden Parti Pesaka Bumiputera Sarawak (PBB) madah mandat ke diatu nya ukai enggi iya.
“Enti aku bulih mandat ke besai, aku ulih bediri tegap di mua Perintah Besai lalu sida deka mendingka jaku aku ti ngarika Perintah Sarawak.
“Iya ke berat iya nya mandat besai ketegal mandat ke diatu ukai mandat aku. Mandat nya ditampung ari Pehin Sri Abdul Taib Mahmud rambau pengawa bepilih taun 2011.
“Aku deka mandat enggi aku empu diatu lalu aku dekaka ke pemadu besai,’ku iya.
Ba pengerami nya mega, Adenan ke nyadi Chairman BN Nengeri madah Sarawak deka napi pengawa bepilih besai dalam awak ke semak, ke alai iya mega madah Tuai Pemegai Menua (TYT) Pehin Sri Abdul Taib Mahmud setuju dia Dewan Undangan Nengeri (DUN) deka dipadam kena 11 April 2016.
“Tiga hari ke udah aku bisi betemu enggau TYT minta DUN dipadam ngambi kitai ulih ngadu pengawa bepilih. Iya setuju madamka DUN lalu nentuka dipadam kena 11 April 2016.
“Udah nya Komisyener Pengawa Bepilih (SPR) deka nentu maya nganjung nama chalun enggau maya muai undi,’ku iya seraya madah serak tu penyampau 82 penuduk deka dikerebut, ukai 71 agi.
Nya nambah ari 82 sitak bepilih DUN nya, PBB deka bediri ba 40 iti penuduk.
Ku iya enti menang semua ba 40 iti penuduk nya, kitai ulih numbuh perintah kitai empu begulai enggau kaling bukai dalam serakup BN.
“Minimum 40, tang kitai enggai semina menang mimit aja, kitai deka menang besai,”ku iya.
Adenan mangku pengawa nyadi Kepala Menteri Sarawak ke-5 ari Pehin Sri Taib kena 28 Februari 2014.-BP
No comments:
Post a Comment